2023 жылдың 6-8 маусым аралығында Алматы облысы «Балдәурен» Қонаев РОСО-нда Ұлттық Дельфий комитеті Нұрсұлтан Назарбаев қорының «ЖЕҢІСТЕРГЕ БІРГЕ» VI параолимпиадалық жарысы өтті.
Бұл жоба мүмкіндігі шектеулі балалардың спорттық және шығармашылық жетістіктерін көрсету, спорт және дене шынықтыру саласында инклюзивті білім берудің жаңа дағдыларын игеру, қоғамға бейімдеу және әлеуметтендіру мақсатында мақсатты аудитория үшін бірегей алаң құруды көздейді.
Жарысқа есту және көру қабілеті нашар, тірек-қимыл аппараты зақымданған мүгедектігі бар 14-19 жастағы ұлдар мен қыздар қатысты. Республика бойынша жалпы саны 176 адам, 22 адамнан тұратын 8 команда жарыста бақ сынасты. Атап айтқанда, Абай, Ақмола, Алматы, Жамбыл, Жетісу, Түркістан, Ұлытау, Павлодар облыстарының өнерпаздары сайысты.
Параби пәні бойынша Түркістан облысының Жұмыспен қамтуды үйлестіру және әлеуметтік бағдарламалар басқармасының «№4 Тасарық арнаулы әлеуметтік қызметтер көрсету орталығы» коммуналдық мемлекеттік мекемесінің қызмет алушылары Әсем Әлжанқызы мен Олег Вретиков өз өнерлерін ортаға салды. «Арыстан патшасы» және «Менде бәрі жақсы» комби/сингл екі түрлі жанрдағы билері көпшіліктің қошеметіне ие болды. Жарыс нәтижесінде І-орынға ие болып, алтын медальмен марапатталды.
Айта кетейік, хореограф Дария Джумадиллаева балаларды биге дайындаса, орталықтың еңбек инструкторы Айжамал Тоғыспаева арнайы костюмдерін әзірлеген. Шымкент қаласының Заң консультанттары палатасының төрағасы Оралбай Құдайберген және жеке кәсіпкер Сабыржан Танабаев демеушілік көрсетіп, балалардың қуанышының еселенуіне ықпал етті.
Түркістан облысының Өңірлік коммуникациялар қызметі
