18 қазан – Рухани келісім күні. Айтулы күнде, Шымкент қаласының әкімі М. Әйтенов діни бірлестік өкілдерімен кездесіп, оларды арнайы құттықтады. Сондай-ақ, басқосу барысында дін аралық татулық жайы да кеңінен сөз болды.
Қазақстан — зайырлы мемлекет. Сол себепті елімізде дәстүрлі діни конфессиялардың жұмыс істеуіне ешқандай шектеу жоқ. Мемлекеттік саясаттың негізгі мақсаты — бейбітшілік пен келісімді нығайту екенін атап өткен шаһар басшысы, Рухани келісім күнімен түрлі дін өкілдерін құттықтады.
Кездесу барысында еліміздегі дін аралық татулық жайында сөз қозғаған дін өкілдері, зайырлы мемлекетте өмір сүріп жатқандарына дән риза екендерін жеткізді. Бұл күнді арнайы атап өтетін Қазақстаннан өзге мемлекетті әлі күнге дейін естімедім деген Провослав шіркеуінің қызметкері Вениамин Архимандрит еліміздің тыныштығы мен халқымыздың амандығын әркен дұғамызға қосып жүреміз, дейді.
Айтып өтейік, қала аумағында 12 конфессияны білдіретін 121 діни бірлестік тіркелген екен. Сондай-ақ, 9 миссионер бар. Мерекеге орай, конфессия басшыларына қала әкімі Мұрат Дүйсенбекұлы алғыс хаттар табыстады.
Рухани келісім – біздің ұлттымызға тән үлкенді сыйлау, отбасына құрмет, балаларға қамқорлық, қонақжайлылық, татулық, достық, ауызбіршілік сынды ізгі ортақ құндылықтардың берік ортасы. Халқымыздың татулығы мен бірлігі – еліміздің өркендеп, алға басуына себеп болады. Осы байлығымызды қадірлей білу, оны жас ұрпақтың жүрегіне ұялату – еліміздің жарқын болашағының кепілі болмақ.
