Денсаулық сақтау саласының ардагерлеріне құрмет көрсетілді. Республика күніне орай, түркістандық денсаулық сақтау саласының ардагерлеріне құрмет көрсетілді. Министрліктің ведомствалық наградаларын табыстаған Түркістан облысы әкімінің орынбасары Арман Сабитов ақ халатты абзал жандардың кеудесіне «Еңбек ардагері» төсбелгісімен, «Денсаулық сақтау ісіне қосқан үлесі үшін» медалін тақты.
Бар құрмет пен ыстық ықылас ақ халатты абзал жандарға арналды. Әсіресе, пандемия кезіндегі дәрігерлердің ерен еңбегі ерекше аталып өтілді. Салтанатты жиында денсаулық сақтау саласында қызмет етіп жүрген медицина мамандарына «Еңбек ардагері», «Денсаулық сақтау ісіне қосқан үлесі үшін», «Денсаулық сақтау ісінің үздігі» төсбелгілері табысталды.
Айтулы күнде абыройы артып, құрметке бөленгендердің бірі – Икрам Төлеев. Салаға еңбегі сіңген ардагер, әлі де медицинадан қол үзбеген. Бар білген, түйгенін болашақ дәрігерлерге үйретуден жалықпайтын ақ халатты абзал жан, еңбегінің еленгеніне дән риза.
Кешке келген қонақтар облыстағы денсаулық сақтау саласында атқарылып жатқан жұмыстарға да қанық болды. Айтып өтсек, Түркістан облысында өткен жылы мемлекеттік-жекешелік әріптестік бағдарламасы шеңберінде 4 фельдшерлік-акушерлік пункт салынып ауыл тұрғындарына пайдалануға берілді. Биыл тағы да 4 фельдшерлік пункт құрылысы жүргізілуде.
Сонымен қатар, ауылдық жерлерде және шалғай елді-мекендерде тұратын халыққа консультациялық-диагностикалық қызметтер үшін көрсету барлық қажетті құрал-жабдықтармен жабдықталған жылжымалы медициналық кешендер арқылы медициналық көмек көрсетілуде. 2021 жылы 2809 медицина қызметкері біліктілігін арттырды, оның ішінде 109 қызметкер АҚШ, Түркия, Ресей елдерінде білімдерін жетілдірді. Осы жұмыстар биыл да жалғасын табуда. 2022 жылдың 9 айында 1223 медицина қызметкері біліктілігін арттырды, сондай-ақ Түркия еліне оқуға жіберу жоспарлануда. 2023 жылы 4 аудандық аурухананы (Сайрам, Ордабасы, Сарыағаш, Жетісай) көпбейінді аудандық аурухана етіп қайта құру жоспарланып отыр.
