Билікке деген сенім қазіргі қоғамның талаптарына сай мемлекеттік қызметшіден басталады. Мемлекеттік қызмет атқару – қоғам мен мемлекет тарапынан көрсетілген ерекше сенімнің белгісі. Арамызда өзіне сеніп тапсырылған мемлекеттік қызметті мінсіз атқарып жүргендер аз емес. Солардың бірі — ҚР Еңбек және халықты әлеуметтік қорғау министрлігі Еңбек және әлеуметтік қорғау комитетінің Шымкент қаласы бойынша департаментінің халықты әлеуметтік қорғау саласындағы бақылау бөлімінің басшысы Шолпан Байболова.
Ол 1970 жылы 27 қаңтарда Кентау қаласының Байжансай елді мекенінде туған. Әкесі Ерназар 45 жыл мектепке басшылық етті. Ұлағатты ұстаз білім саласының үздігі еді. Ал, анасы Тоты 26 жыл медицина саласында абыройлы қызмет атқарды, 12 баланы дүниеге әкеліп, Батыр ана атанды. Ерназар мен Тоты тәрбиелеген перзенттердің төртеуі қазір мемлекеттік қызметте жүр. «Ұяда не көрсең, ұшқанда соны ілерсің» демекші, жақсы отбасыда тәрбие алған Шолпан мектепті үздік үлгеріммен аяқтап, жоғары білім алды. Оның экономикалық, педагогикалық және заңгерлік мамандығы бар. Мемлекеттік қызмет саласында 30 жылдан астам еселі еңбек етіп келеді. Білікті кадр.
– КСРО-ның кезі. 1988 жыл. Жасым 18-де. Сол жылы Шымкент кооператив техникумының комсомол комитетінің хатшысы болып сайланған едім, – деп еске алады Шолпан Ерназарқызы. – Республика бойынша ең жас комсомол комитетінің хатшысы едім. Шымкент облыстық партия комитетін Асанбай Асқаров ағамыз басқарған тұс. Ал, өңірлік комсомол ұйымының тізгіні Абдулла Ахметов ағамыздың қолында еді. Осы кісілерден көп тәлім алдық, адами қасиеттерді үйрендік.
Отыз жыл ішінде Шолпан бірқатар мемлекеттік органдарда қызмет етті. Атап айтқанда, Түлкібас аудандық ауыл шаруашылығы басқармасының бас диспетчері, Шымкент қаласы, Еңбекші аудандық салық инспекциясының аға салық инспекторы, Түлкібас аудандық статистика бөлімі бастығының орынбасары, ОҚО ішкі істер департаментіне қарасты Түлкібас АІІБ-де штаб жетекшісі және төлқұжатшысы, ОҚО спорт және дене шынықтыру департаментінің кадр ісі бойынша бас маманы, ҚР Еңбек және халықты әлеуметтік қорғау министрлігі Бақылау және әлеуметтік қорғау комитетінің ОҚО бойынша департаментінің бас маманы, ҚР Денсаулық сақтау және әлеуметтік даму министрлігі Еңбек, әлеуметтік қорғау және көші-қон комитетінің ОҚО бойынша департаменті Еңбек және әлеуметтік қорғау комитетінің Шымкент қаласы бойынша департаментінің персоналды басқару бөлімінің бас маманы қызметтерін атқарды. Қазіргі уақытта аталмыш департаменттің халықты әлеуметтік қорғау саласындағы бақылау бөлімінің басшысы болып қызмет атқаруда.
Мемлекеттік қызметшінің ұзақ жылғы мінсіз еңбегі ескерусіз қалған жоқ. Өңірінде «Қазақстан Конституциясына – 25 жыл» мерекелік медалі жарқырайды. ҚР Мемлекеттік қызмет істері агенттігінің, Статистика министрлігінің, Еңбек және халықты әлеуметтік қорғау министрлігінің, Денсаулық сақтау және әлеуметтік даму министрлігінің, республикалық кәсіподақтар бірлестігінің Құрмет грамоталарымен марапатталып, «Әлеуметтік еңбек саласының үздігі» атанды. Алғыс хаттары да жетерлік.
Шолпан қоғамдық жұмыстарға да уақыт табады. Мәселен, ол Шымкент қаласындағы М.Мәметова атындағы №35 жалпы білім беру мектебінде қамқоршылық кеңесінің төрайымы, бүкілмектептік ата-аналар комитетінің төрайымы, «Турон» облыстық әскери-спорт түрлері қоғамының мүшесі, «Соғыс және радиация апаттарының мүгедектері» ОҚО қоғамдық бірлестігі төрағасының әйелдер секторы бойынша орынбасары ретінде ел дамуына лайықты үлес қосып жүр.
С.МӘТҚАЛИҰЛЫ.
