Жаз – жарқын мезгіл. Ауыл баласы – қалаға, қала баласы – ауылға ағылады, оқудан босаған оқушылардың кейбірі демалыс лагерлеріне баруға таңдау жасайды.
Олардың қуаныш пен шаттыққа толы ұмытылмас естеліктері осындай жазғы демалыс лагерінен бастау алары сөзсіз.
Осы орайда, Түлкібас ауданында биыл жаз айларына арналған жұмыс кестесі бойынша, аз қамтамасыз етілген отбасылар үшін қала сыртындағы лагерлер өз есіктерін айқара ашты. Биылғы жоспарға сәйкес, Келтемашат ауылындағы “Ерке” және “Арман” сауықтыру орталықтарына 1279 бала демалысқа жіберілмек.
Еске сала кетсек, 16 шілде күні аудан әкімінің орынбасары Ербол Орманов демалысқа шыққан оқушыларды құттықтап, алғашқы лекпен кететін 250 оқушыны сауықтыру орталықтарына шығарып салған болатын. Алдағы уақытта аталған лагерлерде кезең-кезеңімен оқушылар 10 күндік демалыстарын өткізбек.
Бұл ретте, балалардың қауіпсіздігі — басты назарда. Бүгінде демалыс аймақтарында екі инспектор қамтылған. Ауысыммен жұмыс уақытын белгілеп алған тәртіп сақшылары күндіз-түні балалардың қауіпсіздігін бақылауда. Табиғат аясындағы демалыс, таза ауа, жайдары көңіл күй, сергектік балаларға күш-қуат сыйлап, жаңа оқу жылына бар ынта-жігерімен кірісуге септігін тигізері сөзсіз.
Түркістан облысының Өңірлік коммуникациялар қызметі
