Бүгін «Самұрық-Қазына» қоры қолдаған «Табысты отбасы» әлеуметтік жобасы түлектерінің бастаған кәсібімен арнайы танысуға аудан әкімінің орынбасары Алдияр Қозыбаев, ауданның жұмыспен қамту және әлеуметтік бағдармалар бөлімінің басшысы Б.Ибрагимова, халықты жұмыспен қамту орталығының директоры Д.Динашова, «Табысты отбасы» жобасының авторы Айжани Нұрланова және жоба тәлімгері Ұланбек Нұрманов арнайы барды.
Алдымен Сарыағаш қаласындағы «Табысты отбасы» жобасының түлектері Айман Жалалова, Әйгерім Тәжібаева және Мөлдір Маханова біргелікте «Алып» базары маңынан ашқан «Ariana» сұлулық салонының салтанатты ашылу рәсіміне қатысты. Жоба авторы Айжани Нұрлановна сұлулық салонының қызыл лентасын қиып, жоба түлектеріне сәттілік тіледі.
Содан соң, «Дәулет» базарындағы «Әдемі» ательесінде болып, жұмыс барысымен танысты. Мұнда жобаның бірнеше түлегі жұмыс істейді. Жоба қатысушыларын «Тігін ісі» бейіндік бағытына үйреткен шебер тігінші жоба соныңда төрт түлекті өз ательесіне шақырған. Бүгінгі таңда мұнда «Тұсау кесуге» арналған ұлттық киімдерден бастап автобус қаптарына дейін тігу үшін кез-келген тапсырыстарды қабылдауда.
Сонымен қатар, «Есен ата» сауда орталығындағы ателье жанында «SMM» бейіндік бағыты бойынша оқудан өткен көп балалы ана Жұлдыз Қарсыбаева жұмыс істеуде. Ол қонақтарға студияны көрсетіп, жұмыстағы кедергілері туралы және оған бұл қызмет бағыты қаншалықты қызықты екенін айтып өтті.
Сондай-ақ, Құркелес ауылдық округі, Береке елді мекеніндегі көп балалы ана Гүлнар Исаеваның үйінде болып, жұмысымен танысты. Көп балалы ана жобада оқығаннан кейін және «Samruk-Kazyna Trust» қорынан грант алып табысты жұмыс істей бастаған. Қатысушы бүгінде торттар мен түрлі кондитерлік өнімдерге тапсырыс алып, кәсібін дөңгелетуде.
Сарыағаш ауданы әкімдігінің баспасөз қызметі
