ҚР Журналисттер Одағының Түркістан облыстық филиалының төрағасы, «Егемен Қазақстан» газетінің тілшісі, журналист, ақын Ғалымжан Елшібайдың бастамасымен ерекше балалардың шығармашылығын дамыту, бағалау, ынталандыру арқылы олардың әлеуметтік бейімделуіне жәрдемдесу мақсатында өткен «Сен таланттысың, сен дарынсың» атты байқау мәресіне жетті.
Бүгін, аудандық Мәдениет үйінде байқау қорытындысы бойынша жеңімпаз атанғандарды марапаттау рәсімі өтті. Төлеби аудандық жұмыспен қамту және әлеуметтік бағдарламалар бөлімінің ұйымдастыруымен өткен мерекелік жиын барысында балалардың шығармашылығына арналған бейне ролик көрсетілді. Кейіннен сурет салу, қол өнер бұйымдарын дайындауда шығармашылық қиял, ептілік, икемділіктерін таныта білген балаларды дипломмен марапаттап, қолданбалы қолөнер бұйымдарын дайындауға қажетті заттар сыйға тарту етті.
Марапаттау рәсіміне арнайы келген «AMANAT» партиясынан сайланған облыстық мәслихат депутаты Ғалымжан Қамытбекұлы байқауды ұйымдастырған бөлім қызметкерлері мен ата-аналарға ризашылығын білдіріп, «Алғыс хат» табыс етті. Балалар өз кезегінде қамқорлық танытқан жомарт жүректі, депутат ағаларына өлең шумақтарын оқып берді. Ерекше балаларға жылулығын төгіп, мүмкіндігі шектеулі жандарға қолдау көрсетіп, қоғамға бейімдеуге ат салысып жүрген Ғалымжан Қамытбекұлы балаларға балмұздақтар таратты.
Аудандық жұмыспен қамту және әлеуметтік бағдарламалар бөлімінің басшысы Рабиға Ермекбайқызы балаларға педагогикалық-психологиялық жәрдем беріп, ерекше жандарды оңалту және оларға жан-жақты көмек көрсетумен айналысатын мамандардың еңбегін ерекше атап өтіп, алғысын жеткізді.
Төлеби ауданы әкімінің баспасөз қызметі
