Бүгінде қоғамымыздың дертіне айналып отырған есірткі адамдардың өміріне зиянын келтіріп, көп отбасының шаңырағын шайқауда. Есірткіге тәуелділік тек ересек жандарды ғана емес, соның ішінде жастардың да санасын улап, құрдымға әкетіп жатыр.
Осы орайда, бүгін аудан әкімдігі мен аудан прокуратурасының ұйымдастыруымен орталық алаңда есірткі заттарын теріс пайдалану және нашақорлықпен күресуге бағытталған айлық іс-шаралар легі басталды. Аталған іс-шараға білім ұйымдары мен аудан жастары қатысуда.
Айлықтың басты міндеті – қоғамды біріктіріп, есірткіге қарсы іс-шаралар кешенін іске асыру. Олардың барлығы салауатты өмір салтын насихаттауға, есірткінің зияндылығы жөнінде халықтың хабардар болуын арттыруға және балалардың, жасөспірімдер мен жастардың денсаулығын сақтауда, есірткі қауіпінің алдын алу жұмысының маңыздылығын түсінуге бағытталған.
Іс-шарада аудан әкімі Нұржан Ізтілеуов пен ауданымыздың прокуроры Нұрғали Асканбеков сөз сөйлеп, бүгінде қоғамның дертіне айналып отырған есіркімен күрес баршамыздың міндетіміз екенін атап өтті.
Шара барысында аудандық мектеп ұжымы мен оқушыларының «Біздің мектеп есірткіге қарсы» ұранымен шеру, флешмобтар ұйымдастырылып, мекемелер арасындағы жарыстармен жалғасты.
Түлкібас ауданы әкімдігінің баспасөз қызметі
