Бүгін аудандық мәдениет үйінде ауданның құрметті азаматы, ардақты ана, асыл жар, аяулы әже ауданымыздың өсіп өркендеуіне мол үлес қосып жүрген
Мәрия Зәйтүнқызының мерейтойы аталып өтілді. Айтулы шараға аудан әкімінің орынбасары Қыдыр Сейітқұл, ауданның құрметті азаматтары, зиялы қауым өкілдері, мұғалімдер қатысты.
Аудан әкімінің орынбасары ұстаздық етуден еш жалықпаған, бүгінде қоғамдық жұмыстарда қашанда белсенді болып жүрген мерейтой иесіне ақ тілегін айтып, алғысын білдірді:
— Құрметті Мәрия Зәйтүнқызы! Сіз көптеген парасатты да рухы биік шәкірттерді оқыттыңыз, қанат қақтырып самғаттыңыз. Қызмет барысында ұлтжанды ізбасарлар тәрбиелеп, елдің ықыласына бөленіп, шәкірттеріңізбен әріптестеріңіздің алдында абырой биігінен көрініп жүрсіз. Сізді осынау мерейлі жасыңызбен құттықтай отырып, абыройлы еңбегіңіздің зейнетін көруіңізге, ел құрметіне бөлене беруіңізге тілектестігімді білдіремін.
Мәрия Зәйтүнқызы 1943 жылы 9 мамырда Бәйдібек ауданындағы Алмалы ауылында өмірге келген. 1962 жылы орта мектепті бітіріп, алмалы 8 жылдық мектебінде пионер вожатый болып еңбек жолын бастаған.
1964 жылы мамыр айында ауданымызда жаңадан құрылған оқушылыр үйінің директоры болып қызмет атқарған.
1968 жылы Шымкен педагогикалық институтының тарих факультетін бітіріп,
1969 жылы бөржар ауылындағы Абай ЖОМ тарих пәнінің мұғалімі болған. 1971-1975 жылдары Ақдала ауылында Саттар Ерубаев мектебінде, 1975 жылдары Амангелді орта мектебінде, 1986 жылы Ш.Уалиханов мектебінде тәрбие завучі, 1989 жылы директоры болып сайланған. 1993 жылы тұңғыш рет ауданымызда Ш.Уалиханов атындағы гимназия мектебін ашқан. Ауданның құрылуына 40 жыл толу мерекесіне орай Ордабасы ауданында тарихи-өлкетану мұражайын ашқан. Осы мұражайда 2005-2011 жылдар аралығында директор болып жұмыс жасаған. 2002 жылы зенеткерлік жасына жетіп, қосымша қоғамдық негізде «Әйелдер кеңесінің» төрайымы қызметін 2018 жылға дейін атқарып келген.
Ардагер ұстаздың кездесу кешінде замандастары сол жылдарда бастарынан өткерген қиындығы мен қызығы қатар жүрген естеліктерді айтып, сыр шертті.
Аудан өнерпаздары ән айтып, би билеп, кештің сәнін келтірді.
