Д. Сатыбалды: «Тұрғындарға қолайлы жағдай жасау керек». Тұрғындарды газбен қамту мәселесі Түркістан облысының әкімі Дархан Сатыбалдының бақылауында. Облыс әкімі жауапты басқарма басшысы мен аудан, қала әкімдеріне тұрғындарды жедел «көгілдір отынмен» қамтамасыз ету бағытындағы жұмыстарды күшейтуді тапсырды. «ҚазТрансГаз» АҚ-ның Түркістан облысындағы филиалына да ұсыныстар берілді.
Дархан Сатыбалды – Түркістан облысының әкімі
Адамдар газ келді деп қуанады. Бірақ газды үйге кіргізуге дейін түрлі қиындықтардан өтеді. Осы мәселені бақылауға алып, тұрғындарға қолайлы жағдай жасау керек. Газ саласына қатысты әрбір мәселеге жауапты тұлғалар бекітіліп, тұрақты мониторинг жасалуы тиіс
Облыстық энергетика және тұрғын үй-коммуналдық шаруашылық басқармасының хабарлауынша, өңірде 31 автоматтандырылған газ тарату станциясы бар. Тағы бесеуінің құрылысы жүргізіліп жатыр. 2022 жылғы 1 қаңтардағы жағдай бойынша 831 елді мекеннің 457-сі табиғи газбен қамтылған. Елді мекендегі халық санымен есептесек 1 млн. 529 мың тұрғын немесе 73,7 пайызы табиғи газды қосу мүмкіндігіне қол жеткізіп отыр.
2022 жылы 69 газ нысанының құрылысына 15,9 млрд. теңге бөлініп, оның ішінде 9 нысанның құрылысы биыл аяқталады. Қалған 60 нысанның құрылысы 2023 жылы аяқталуға тиіс. Алдағы 3 жылда қосымша 255 елді-мекен табиғи газға қосылады деп жоспарланып отыр. Осылайша 2025 жылы жалпы 722 елді-мекен немесе 2 млн. 3 мың тұрғын «көгілдір отынның» игілігін көреді. Сонымен бірге жиында мамандар тұрғындар баспаналарын газға қосу үшін алдын-ала қамдану керегін ескертті.
Түркістан облысында тұрмыстық зорлық-зомбылық фактілері бойынша әкімшілік жауапкершілікке тарту үшін 2 мыңнан астам іс-құжаттар сотқа жолданған. Істің 64 пайызы сотта тараптардың татуласуымен қысқартыған. Сараптама қорытындысы көрсеткендей, тұрмыста жасалған қылмыстардың 30 пайызы мас хәлде немесе спирттік ішімдіктерді бірлесіп ішу кезінде туындаған. Мастықпен жасалатын қылмыстар мен құқық бұзушылықтардың алдын алу мақсатында Ордабасы ауданының «Жусансай», «Ақ қойлы», Жетісай ауданының «Алмалы» және Мақтаарал ауданының «Жеңіс» елді мекендерінде тұрғындардың бастамасымен дүкендер спирттік ішімдік сатудан бас тартқан. Аталған елді мекендерде қылмыс саны азайған. Бұл мәселе де облыс әкімі Дархан Сатыбалдының төрағалығымен өткен аппарат отырысында талқыланды.
«Amanat» партиясының сайлауалды бағдарламасын орындау бағытында 234 отбасын қолдау орталығын ашу көзделген. Аймақта биыл 3 орталық ашылды, жалпы 4 жылда 16 орталық ашу жоспарланған.
