Қазақ «Қариясы бар ел – қазынасы бар ел»,- дейді. Қарияларымызды құрметтеп, ардақтау – біз үшін парыз. «Үлкенге – құрмет, кішіге – ізет» ете білген, бізге тағылымды жол көрсеткен аға ұрпақтың берген тәрбиесі мен тәлімі мол. Осы ретте 1 – қазан Халықаралық қарттар күніне орай Сауран ауданының белсенді оқушылары мен өзін-өзі басқару ұйымының мүшелері аталған елді мекен қарияларының шаңырағында болып, зейнеткер, ақсақал, қазына-қарттарымызды құттықтап қайтты. Сондай-ақ, игілікті іс-шара шеңберінде ата-әжелеріміздің үй шаруасына көмектесіп, ауласын тазартты. Халқымыздың және Отанымыздың игілігі үшін ел мүддесін бәрінен биік қоятын, қазына-қарттарымыздың өзінен кейінгі інілеріне ізеттігін аямайтын, ұрпағына ұлылығын ұяла білген ауыл қарттарының орны ерекше. Ортамызда жүрген қарияларымыздың бір кезде елі, халқы, келешек ұрпағы үшін жасаған игі істері ешқашан ұмытылмақ емес.
Айта кетейік, Халықаралық Қарттар күні 1990 жылы 14 желтоқсанда БҰҰ Бас Ассамблеясымен жарияланған.
Қарттар күнін атап өтудің мақсаты – қарттардың проблемаларына қоғамның назарын аудару; қоғамның демографиялық қартаю проблемасы, қарт адамдардың жеке және әлеуметтік қажеттіліктері, олардың қоғамның дамуына қосқан үлесі, қарт адамдарға деген қарым-қатынасты өзгерту мәселелерінен халықтың хабардарлығын арттыру, қарт адамдардың тәуелсіздігін қамтамасыз ету, қоғам өміріне қатысуын, қажетті күтім, олардың ішкі әлеуеті мен абыройын қорғау үшін жағдайлар жасау.
Әр азаматқа қартайған шақта лайықты өмірді қамтамасыз ету – Қазақстан Республикасы Үкіметінің әлеуметтік саясатының негізгі міндеттерінің бірі болып табылады.
Ардагерлерді әлеуметтік қорғау шаралары орталық деңгейде, сондай-ақ, аймақтық деңгейде де жүзеге асырылуда.
Әлеуметтік қорғау саласындағы мемлекеттік саясаттың негізгі құрамдауышы зейнетақымен қамсыздандыру болып табылады.
2017 жылы зейнетақымен қамсыздандыруды жетілдіру бойынша бірқатар бастамалар көзделіп «Қазақстан Республикасының кейбір заңнамалық актілеріне әлеуметтік қамсыздандыру мәселелері бойынша өзгерістер мен толықтырулар енгізу туралы» Заң қабылданып, 20 маусымда Мемлекет басшысымен қол қойылды.
