Еркін және әйелдер күресінен халықаралық дода басталды. Түркістанда «Olympic center» спорт кешенінде еркін және әйелдер күресінен жастар арасындағы XXVI-шы Халықаралық турнир басталды. Байрақты бәсеке Кеңес Одағының батыры, генерал-майор Сабыр Рақымовты еске алуға және туғанына 120 жыл толуына орай ұйымдастырылып отыр. Күрес додасына көршілес Өзбекістан, Қырғызстан елдерімен қатар Қазақстан Республикасының барлық облыстары және қалалары қатысуда. Еркін күрестен жастар арасындағы халықаралық жарыстың салтанатты ашылу рәсімінде сөз алған Түркістан облысының дене шынықтыру және спорт басқармасының басшысы Қанат Жолдықараев жарысқа қатысушы балуандарды және қонақтарды құттықтап, мықтылардың жеңіске жетуін тіледі.
Төртжылдықтың басты бәсекесі олимпиада ойындарының көркін қыздыратын күрес түрлері бүгінде әлемде қарқынды дамуда. Осы орайда дәстүрлі түрде ұйымдастырылып келе жатқан бұл халықаралық доданың жастарымыздың шеберліктерін арттыруға үлкен серпін береді, -дейді ұйымдастырушылар.
Тартысқа толы бәсекеде ұлдар 11 салмақ дәрежесінде жеңімпаздарды анықтаса, қыздар 10 салмақ дәрежесінде өзара бақ сынайды.Сайысқа жалпы 337 спортшы қатысуда. Халықаралық күрес бәсекесі 3 күн бойына жалғасады. Жарыстың өтуіне Түркістан облысының дене шынықтыру және спорт басқармасы, облыстық №1 олимпиада резервінің мамандандырылған балалар мен жасөспірімдер спорт мектекбі мұрындық болды.
