Саурандағы «Достық» айтысы көптің көңілінен шықты. Мәуліт айы құтты болсын. Сауран ауданында діни мерекеге орайластырып айтыс өтті. Мәдени кеш жеке кәсіпкер Құдайберген қажы Құсбековтің қолдауымен жүзеге асты. Бұл доданың ерекшелігі , мұнда жеңімпаз болған жоқ. Ақындар өзара «Достық» айтысын құрып, халықтың алғысын арқалады.
Исламдағы діни мерекенің бірі мәуліт күні. Осы мерекенің құрметіне ұйымдастырылған сөз бәйгесіне еліміздің арқалы ақындары қатысты. Айтыстың ақтаңгерлерінің барлығы да Түркістан облысының өнерпаздары. Сөз додасының майталмандары Бөрібай Оразымбетов пен Карима Оралова айтыстың шымылдығын түрді.Олар өзара қалжыңдасып, жезде мен балдыз айтысын көрсетті.
Айтысқа келген 5 ақын үш жұп болып жыр додасына түсті. Екінші жұп белгілі ақын Қажымұқан Абзалов пен Нұрғали Анапия, аға мен іні арасындағы сыйластықты көрсете білді. Асыл сөзден, маржан терген ақындар Сауранның тарихы мен бүгінін жырлады.
Соңғы жұпта Нұрлыбек Мейірманов пен Карима Оралова айысты. Құдайберген қажының биылдыққа ұйымдастырған 2-ші айтысы көпшіліктің көңілін бір серпілтті.
Еске салсақ, ауданның 1 жылдық мерейтойында дәл осындай достық айтысы өткен болатын. Ал, аудан жұрты Сауранда осындай мәдени кештер жиі өткізіп тұрса деген ниетпен тарқады.
