Жетісай ауданының прокуроры Айдархан Жүнісбековтің төрағалығымен аудан аумағында құқықбұзушылық профилактикасын кешенді жүзеге асыру шараларын нақтылау, пысықтау, кәмелетке толмағандар арасындағы құқық бұзушылық пен оларға қатысты зорлық-зомбылық профилактикасы бағытында уәкілетті органдармен жүргізіліп жатқан жұмыстардың тиімділігін қарау мақсатында мекеме аралық мәжіліс болып өтті.
Аталмыш жиынға Жетісай ауданының әкімі Серік Үсенұлы Мамытов пен қала, кент, ауылдық округ әкімдері, аудандық полиция бөлімі басшысының бірінші орынбасары Марат Қадырқұлов пен аудандық адами әлеуетті дамыту бөлімінің қызметкерлері, аудандық «Жастар ресурстық орталығы» КММ мен аудандық «Халықты жұмыспен қамту орталығы» КММ басшылары, ветеринария саласының мамандары қатысты.
Аталмыш жиын барысында аудандық полиция бөлімі басшысының бірінші орынбасары Марат Қадырқұлов пен аудандық «Жастар ресурстық орталығы» КММ басшысы, аудандық адами әлеуетті дамыту бөлімі мен ветеринария саласының мамандары атқарылған жұмыстар бойынша есебін берді.
Биылғы жылдың басындағы 2 ай мен кейінгі 2 айда аудандағы криминогендік ахуал бойынша тіркелген қылмыс саны 114-тен 34-ке, оның ішінде аса ауыр қылмыстар 100%-ға, ауыр қылмыстар 52-ден 6-ға, ауырлығы орташа қылмыстар 21-ден 14-ке, онша ауыр емес қылмыстар 21-ден 3-ке төмендеген.
Сонымен қатар, қоғамдық орындарда жасалған қылмыстар 24-тен 10-ға, көшеде жасалған қылмыстар 12-ден 6-ға, алаяқтық қылмысы 14-тен 8-ге және алаяқтық қылмысы 4-тен 1-ге, жалпы ұрлық 38-ден 12-ге кеміген.
Жиын барысында аудан әкімі Серік Үсенұлы аудан аумағында патрульдік полиция инспекторларының жұмыстарын жандандыру, қолда бар ресурстарды тиімді пайдалану жайын айтса, аудан прокуроры Айдархан Жорықбайұлы аудандағы тұрмыстық зорлық-зомбылықтың, әйелдер мен кәмелетке толмағандарға қатысты қылмыстардың, кәмелетке толмағандардың жыныстық тиіспеушілігінің, жол-көлік оқиғаларының, есірткі құралдарының айналымына байланысты қылмыстардың, желілік, әлеуметтік және өзге де интернет-алаяқтықтың түрлері бойынша түсіндіру жұмыстарын кеңінен жүргізуді, ұрлық қылмыстарының алдын алу мақсатында көшелерді мүмкіндігінше жарықтандыруды тапсырып, жұмыстардың нәтижесін жеке бақылауына алатынын ескертті.
Жетісай ауданы әкімдігінің баспасөз қызметі
