Түркістан облысында инвестиция тарту жұмыстары күшейтіледі. Облыс әкімі Дархан Сатыбалдының төрағалығымен өткен аппарат отырысында өңірдегі индустриалдық және арнайы экономикалық аймақтарға инвестиция тарту жұмыстары талқыланды. Сонымен бірге индустриалдық және арнайы экономикалық аймақтарды инженерлік-коммуникациялық инфрақұрылыммен қамтамасыз ету шаралары және тарифтеріне қатысты түйткілдер де тарқатылды. Өңір басшысы бұл саланың маңызды екенін тоқталып, инвестиция тарту ісін жандандыруды тапсырды.
Облыс басшысы алдымен индустриалды аймақтардың жер мәселесі және оған қажетті инфрақұрылым бойынша жол картасын әзірлеу керектігін айтты. Сондай-ақ ірі компаниялар мен инвесторларға қолайлы жағдай жасап, Түркістан облысына шақыру керектігін жеткізді.
Бүгінде облыста 9 индустриалды аймақ бар. Сонымен қатар «TURKISTAN» арнайы экономикалық аймағы жұмыс істеп тұр. Қазіргі таңда 365 гектар өнеркәсіптік аймағының инфрақұрылым жүйелерінің І және ІІІ кезеңінің құрылыс жұмыстары жүргізілуде.
Инвесторларға қолайлы жағдай жасау үшін алдымен коммуналдық тарифтерді реттеу керек. Өңір басшысы электр қуатына қатысты тарифті төмендету бойынша жауаптыларға тапсырма берді. Жиында индустриалды аймақтарда жұмысты жандандыру, жаңа кәсіпорындарды ашу ісін күшейту жөнінде айтылды.
Индустриалды аймақтарда құны 24,млрд. теңге болатын және 2614 жұмыс орнын құрайтын 56 жоба орналасқан. Оның ішінде құны 15,542 млрд. теңге болатын және 2087 жұмыс орнын құрайтын 40 жоба іске қосылып, жұмыс атқаруда. Биыл 266 жаңа жұмыс орнын ашуға мүмкіндік беретін 7 жобаны іске қосу жоспарланған.
