Сарыағаш ауданы, Жартытөбе ауылдық округінде 398 «Алтын алқа», 337 «Күміс алқа» иегері тұрады. Әрбір көп балалы шаңырақ мемлекеттің байлығы десек, олар бала тәрбиелеп қана қоймай, мемлекеттің демографиялық өсіміне де өз үлестерін қосып жүр. Осындай отбасылардың бірі – Сары-ағаш ауданы, «Достық-2» ауылында тұратын Пірімбетовтер отбасы. Данияр Пірімбетов пен Айнұр Меңлібаева жеті ұл-қыз өсіріп отыр. Олардың отасқандарына биыл 22 жыл болыпты. Отбасындағы 4 ұл, 3 қыздың үлкені 21 жаста болса, кенжелері 2 жаста. Қазығұрт ауданында туып-өскен Айнұр да көп балалы отбасыдан шыққан. Үйінің кенжесі, оныншы перзенті екен. Бүгінде Айнұр «Сарыағаш» емдеу-сауықтыру кешенінде кіші қызметкер болып жұмыс істейді. Қашан да ата-ана үшін балаларының ақылды, білімді, адал болып өскені маңызды. Бұл орайда Айнұрдың үміті ақталғандай.
– Шын мәнінде, ерлі-зайыптылардың көпшілігі үлкен отбасы болып, көп балалы атанғысы келеді. Олар бауырдың көптігінің және есейгенде бір-біріне жанашыр болудың қандай болатындығын жақсы түсінеді. Біз отағасы екеуміз балаларды ақша табудан бұрын еңбекке, мамандықты дұрыс таңдауға үйретеміз. Бұрын өзіміз мұғалім, дәрігер, инженер, құрылысшы боламын деп алдымызға нақты мақсат қоятынбыз. Өкінішке қарай, қазіргі жастардың көпшілігі тез баюды, оңай ақша табуды көздейді. Бәрі кәсіпкер, экономист, заңгер болғысы келеді. Оқу бітіріп алып, мамандық бойынша жұмыс таппай жүргендері қаншама?! Балалардың әкесі осындай қиындыққа тап болмас үшін үйдегі әр баланың тәлім-тәрбиесіне, оқуына жіті мән беріп, ақылын айтып отырады, – дейді алтын құрсақты ана.
Отбасы – мемлекеттің тірегі. Әр отбасыда ұрпақтан-ұрпаққа берілетін құндылықтар бар. Ол отбасы мүшелері арасындағы сыйластықты арттырып, сенімді нығайтады. Айнұр Нышанқызы көп балалы ана ғана емес, 74 жастағы енесі – Гүлжәмила апасының ақ батасын алған ибалы келін. Екеуінің сыйластығына ауыл тәнті. Қарашаңырақтан еншісі бөлінгеніне неше жыл өтсе де, Айнұр жұмыстан тыс уақытта енесінің жанынан шықпайды. «Көп балалы ана болу оңай емес. Әр баланың мінезі әртүрлі. Бала тәрбиесінде енем көп көмектесті. «Баланы мемлекет үшін тумайсыңдар! Өздерің еңбектеніңдер, наны тәтті болады» деп үнемі біздің жұмыс істеуімізге көмектесіп отырды. Сондықтан болар, апамның арқасында әлі күнге дейін жұмыстан қол үзбей келемін» дейді ол.
Альвира ПАЙЫСХАН.
