Батыр да туған анадан, ақын да туған анадан, Ананың биік тұғыры – анадан туған бар адам.
Бүгін аудан әкімі Нұржан Ізтілеуов еркін форматта аудандық әжелер, аналар алқасының, іскер әйелдер кеңесінің төрайымы және мүшелерімен кездесіп, қоғамдық ұйымдардың атқарып жатқан жұмыстарымен танысты.
Қоғамдық жұмыстарға белсенді араласып, ұлт тәрбиесінің ұйытқысы болып жүрген аналарымыз жұмыс барысындағы өзекті мәселелерді аудан басшысына жеткізді.
Аудан әкімі әр мәселені мұқият тыңдап, игі істерге мұрындық болып жүрген ақ жаулықты аналарымызға барлық қолдауларды көрсетуге дайын екенін жеткізіп, атқарып жатқан қоғамдық жұмыстарына алғысын білдірді.
Айта кетейік, биыл әжелер алқасының құрылғанына 10 жыл, аналар алқасының құрылғанына 5 жыл толғалы отыр. Аталған мерейтойға аудан әкімдігі жан-жақты қолдау көрсетіп, ауданда әжелер мен аналар жұмысын жандандыруға барлық жағдайлар жасалынатын болады.
Жиын соңында аналар қауымы арнайы қабылдап, атқарып жатқан жұмыстарға демеу көрсетіп отырған аудан басшысына алғыстарын жеткізіп, ел игілігі жолындағы қызметіне сәттілік тіледі.
Түлкібас ауданы әкімдігінің баспасөз қызметі
