Грузия астанасы – Тбилиси қаласында жасөспірімдер мен ересектер арасында жекпе-жектің юнифайд түрінен әлем чемпионаты өтті. Осы чемпионатта арыстықтар 4 бірдей алтын, 1 қола жүлдеге ие болып, ел мерейін асқақтатты. 

Чемпиондарды күтіп алуға Арыс қалалық №1 балалар мен жасөспірімдер спорт мектебі алдында жиналған халықтың қарасы қалың болды. Таңсәріден жиналған арыстық ағайын мен спортшылардың ұстаздары, жақындары жеңімпаздарды ортаға алып, сый-құрмет көрсетті.

Алтыннан алқа тағып, спорттың биігінен көрінгендер арасында үш дүркін әлем чемпионы атағын алған Аяжан Ергентай, Жанель Алтынбек және бір үйдің қос қызы Ақнұр Әділ мен Медина Әділ бар. Ал чемпион қыздардың жаттықтырушысы Асхат Күмісбекұлы аталған додада ересектер арасында ІІІ орынды иеленді. Тағы бір арыстық спортшы Болат Тоқсанбай қола медальға ие болды.

Дүбірлі додаға қатысқан спортшылар арасында Кентау қаласының спортшылары да намысты қолдан берген жоқ. «Қаратау тәжі» атанған шаһардың спортшылары 3 алтын, 1 күміс еншіледі.

Атап айтатын болсақ, Иса Бағдат, Нұрбай Нұрбек, Әбдіхан Диас әлем чемпионы атанса, Ерімбет Рауан әлем чемпионатының күміс жүлдесіне ие болды.

Әлемнің мықтылары қатысқан додада қазақ спортшылары жалпыкомандалық есепте І орынды иемденді.