Түркістанда халықаралық ән байқауы басталды. Войс оф Туран деп аталатын халықаралық дода биыл үшінші рет шымылдығын түрді. Жобаның мақсаты: Қазақ музыкасы мен қазақстандық композиторлардың әндерін әлемге насихаттау. Дарынды жастарды анықтау және оларға қолдау көрсету сонымен қатар Түркістанның туристік әлеуетін арттыру.
Халықаралық байқауға қатысу үшін Европа мен Азияның 15 елінен үміткерлер келді. 18-35 жас аралығындағы эстрадалық жанрдағы орындаушылар, үлкен концерттік қойылымдарда тәжірибесі бар. Олардың көбі халықаралық ән байқауларында жетістікке жеткен. Бұл жоба бүкіл Түркі әлемін мәдени тұрғыда біріктіреді. Сондықтан ашылу салтанатына ТҮРКСой ұйымының бас хатшысы арнайы келді.
Байқауға қатысушылар ережеге сәйкес екі шығарма орындайды. Бірінші кезеңде қазақ композиторларының әнін, екінші кезеңде елімізге танымал эстрада әншілерімен бірге қазақ әндерін шырқайтын болады. Өз бағын сынап көруге келгендердің бірі Қырғызстандық Надырбек Мақсұтов.
Өзге елдің әншілеріне қолдау көрсетіп бірге ән шырқау үшін қазақстандық өнер жұлдыздары да арнайы келді. Олардың қатарында мемлекеттік сыйлықтың иегерлері Нұржамал Үсенбаева, Медеу Арынбаев, Айгүл Қосанова Маржан Арапбаева секілді танымал әншілер бар.
Конгресс хол кешенінде өткен концертке келген Түркістандықтардың қарасы мол. жастардан бастап қарияға дейін бәрі осында. Олар Түркістанда осындай жобаның қолға алынғанына дән риза.
Бұл байқау 2020 жылы басталған. пандемияға байланысты жоба онлайн түрде өткен болатын. 2020 жылы Молдовалық Галина Шкода бас жүлдені жеңіп алса, 2021 жылы Бурятиялық Цыден Еши Бимбаев Гран-при иегері атанған. Халықаралық ән сайының нәтижесінде 4 елдің үздік әншілерінен құрылған «Turan Boys» квартеті бүгіндеқазақ әндерін насихаттауда зор үлес қосып жүр.
Халықаралық байқауда, танымал орындаушылар, композиторлар, продюсерлерден құралған кәсіби қазылар алқасы төрелік етеді. Жеңімпаздар түрлі дәрежедегі дипломдармен және қаржылай сыйлықтармен марапатталатын болады.
