2024 жылдың 1 қаңтарынан бастап Ұлттық қордың жыл сайынғы инвестициялық табысының 50 пайызы балалардың арнайы жинақтау шотына аударыла бастайды. Бала 18 жасқа толғанға дейін арнайы шотта қаражат жинақталады. Қаржы еліміздегі 7 миллионға жуық балаға теңдей бөлінеді. 

Ал, бұл бағдарламаға бала қанша жастан бастап қатысады дегенге келсек, ҚР Қаржы министрлігінің департамент директоры Айбол Арғынғазиновтың айтуынша, бала қанша жаста болса, сол жастан бастап бағдарламаға қатысады. Басты ерекшелігі – балада Қазақстан Республикасы азаматтығының болуы. Егер бала азаматтығын сақтай отырып, шет мемлекетке шығатын болса, оның жобаға қатысу құқығы сақталады. Егер бала шет мемлекетке көшіп, ҚР азаматтығынан бас тартса, тиісінше жобаға қатыса алмайды.

Балаларының болашағын ойлаған ата-аналар  үшін мұнан басқа тағы бір мүмкіндік бар. Яғни олар «Келешек» бірыңғай ерікті жинақтау жүйесі арқылы ақша жинай алады. Есепшот ашылғанда мемлекет 60 АЕК мөлшерінде бастапқы капитал салып береді. Ал, ата-ана ай сайын кемі бір айлық есептік көрсеткіш мөлшерінде қаражат құйып отыруы тиіс. Бұл қазір – 3 450 теңге. Осылай бала 18 жасқа толғанға дейін тұрақты түрде қаржы салып тұрса, шотта 3 миллион 300 мың теңге жиналады. Жарна мөлшері 3 (АЕК) айлық есептік көрсеткішке дейін көбейсе, 7 миллион теңгеден астам қаражат жинақталады.

Осы ретте еліміздегі 500 мыңға жуық отбасына баспана алуға қолдау көрсеткен «Отбасы банк» те аталмыш жобаға қатысады. Банктің игі іске қалай атсалысатынын таяуда Орталық коммуникациялар қызметінің алаңында қаржы құрылымының басшысы Ләззат Ибрагимова айтып берген

болатын.

Қазіргі уақытта «Отбасы банкінде» 18 жасқа дейінгі балалардың атына ашылған 300 мыңға жуық депозит бар.