Жаздың бір күні қыстың мың күніне азық. Аптап ыстықты елемей, бел жазбай, маңдайы терлеп тірлік істеп жатқан шаруалардың дені дәл қазір қыр басында жүр. Сондай еңбекқор жандардың бірі түлкібастық Нәзира Телғозиеваны біз  егістік басында  кездестірдік. Ала жаздай еккен егіннің пісіп-жетілгенін көрген ол биылғы табыстың мол боларынан үмітті.  

Түлкібас ауданы, Жаскешу ауылының тұрғыны Нәзира Телғозиева отағасы Нұралы екеуі – 3 ұл, 1 қыз өсіріп, келін алып, немере сүйіп отырған бақытты ата-аналардың бірі.  Жастайынан жер еміп, кетпен шауып, бағбандықтың қыр-сырын біліп өскендіктен оларға диқаншылық кәсіп қиын болмапты. Биыл көктемде мемлекеттен берілген қайтарымсыз грантқа қол жеткізіп, ауыл шаруашылығын дамыту мақсатында 3 гектар жерге қияр еккен. Еткен еңбектің, төккен тердің өтеуі шығар, Телғозиевтеры бүгінде көл-көсір өнім жинап отыр.

– Жолдасым екеуміз осы кәсіпті игеріп келе жатқанымызға біршама жыл болды. Бүгінде еңбегіміздің нәтижесін көріп отырмыз. Табысымыз отбасымызды асырауға толық жетеді. Қазіргі таңда қиярға сұраныс өте жоғары, сол үшін балаларымыз да арасында көмек беріп, қолдау көрсетеді, – дейді Нәзира ханым.

Қазіргі уақытта ерлі-зайыпты Телғозиевтер 20 адамды жұмыспен қамтып отыр. Қиярдың келісін көтерме бағада 90-100 теңгеден босатып жатыр. Отағасы Нұралы Телғозиевтің айтуынша, өнімді клиенттердің өздері арнайы келіп, егіс басынан сатып алып кетеді екен. Бүгінде күніне терілетін 4 тонна қиярды көршілес Сайрам ауданындағы консерві жасайтын зауыттар алып кетеді. Қысы-жазы сайрамдықтар бақша өнімдерінен сан алуан қыстық азықтар дайындап, оны тек облысқа ғана емес, басқа өңірлерге де пұлдайды. Демек, отандық өнім тұтынушыларының қатары күннен-күнге көбейіп келеді.

– Алқапта тек қияр ғана емес, өзге де бақша өнімдері егіледі. Оларды күтіп-баптау да өз мойнымызда. Бұйыртса тамыздың аяғында күздік қиярдың терімін бастаймыз. Алла берекесін берсе, ол жақтанда да күніне тонналап өнім жинап, оңтүстік жұртшылығының сұранысын өтерміз деп отырмыз, – дейді ол.

Бейнетқор отбасы мұнымен тоқтап қалмай, алдағы уақытта өнім көлемін ұлғайтуды жоспарлап отыр.

Биылғы мемлекеттік қайтарымсыз гранттың үшінші легі ағымдағы жылдың қыркүйек айында басталады деген жоспар бар. Демек, алдағы уақытта  шаруасын дөңгелетіп, кәсібін өркендететін кәсіпкерлердің легі көптеп шығары анық.

 Альвира Пайысхан