Түлкібастың тұғырлы тумалары. Дәл осы тақырыпта көрнекті ғалым, абайтанушы, бауыржантанушы, бірнеше ғылыми кітаптардың авторы, мемлекеттік сыйлықтың иегері Мекемтас Мырзахметұлы мен ауданның бас ақыны Әбдібек Аралбайұлы, ақын-сатирик Алпысбай Боранбайұлымен кездесу өтті. Аудан орталығына шалғай орналасқан Арыс ауылдық округіндегі басқосу жайында келесі бейнематерилда.
Алдымен, Керейт ауылдық Мәдениет үйіне ат басын бұрған қонақтар, ондағы кітапхананың қазіргі жай – күйімен танысты. Мұнда, 17 мың 643 дана кітап қоры сақтаулы. Сөрелерден өздерінің кітаптарын көрген тұғыры биік тұлғалар кітапхананың алдағы жұмысына сәттілік тілеп, кездесуді әрмен қарай Ордабай Ағыбайұлы атындағы жалпы орта мектебінде жалғастырды.
Жерлес қаламгелердің шығармашылықтарымен терең танысқан жас буын, олардың туындыларына талдау жасап, өлеңдерін нақышына келтіре орындады. Кездесудің ұлт көсемі Ахмет Байтұрсынұлының 150 жылдығымен тұспа-тұс келгені де кездейсоқтық емес.
Нар тұлғалармен кездесу барысында оқушылар өздерінің көкейлеріндегі сауалдарын қоюға да кезек берілді. Мекемтас Мырзахметұлы мен Әбдібек Аралбайұлы барынша толық жауап беріп, салмақтылықтарын танытса, сатирик Алпысбай Боранбайұлы өзінің табиғи қалпына сай әзіл-қалжың араластыра жауап қайырып, қатысып отырған ұстаздар мен оқушыларды бір көңілдендіріп тастады. Дәстүрге сай қонақтарға шапан жабылып, құрмет көрсетілді. Осы орайда, 95 жастағы Мекемтас Мырзахметұлы мектеп ұжымына өзінің ақ тілегін жеткізіп, батасын берді.
