Түркістанда 18 қазан Рухани келісім күні мерекесіне орай діни конфессия басшылары кездесті. Жиынға Түркістан облыстық дін істері басқармасының басшысы Рүстем Сабыржанұлы жетекшілік жасап, жүргізіп отырды. Кездесуде ел бірлігін сақтау, дінаралық қарым қатынастарды нығайту мәселелері талқыланды. Достық болсын! Достықтан ешкім жеңілмейді. Проваслав дінінің өкілдері осылай дейді. Рухани келісім күні мерекесі елдегі бірлік пен ынтымақтастықтың қайнар көзі іспеттес. Дін – саясаттан бөлек, мемлекеттен бейтарап болғанмен, рухани құндылық ретінде ажырай алмайды. Елімізде діни конфессия өкілдерінің бір шаңырақтың астында ауызбірлікте өмір сүруі мемлекеттің дамуына оң әсер етеді, — дейді ұйымдастырып отырғандар. Олардың басты мақсаты – толеранттылық таныту, ынтымақта өмір сүру.
Жиын барысында түрлі дін өкілдері әлеуметтік, діни тұрақтылық пен достық мәселелерін талқылады. Діни конфессиялар жетекшілеріне мерекеге орай алғыс хаттар мен сыйлықтар берілді. Дінаралық татулық күніне орай конфессия өкілдері спорттық жарыстарға да қатысты.
Түркістан облысы аумағында 6 діни конфессияға енетін жалпы 784 діни бірлестік жұмыс істейді. Олардың қатарында исламдық емес бағыттағы 30 жергілікті діни ұйым мен оның 2 филиалы бар. Сонымен бірге исламдық бағыттағы 752 мешіт елге қызмет етіп жатыр.
