Кентау қалалық орталық кітапхананың Рухани жаңғыру орталығында 15 мамыр — Халықаралық отбасы күніне орай «Отбасы құндылығы-сарқылмас қазына» атты өнегелі сағат өтті. Іс-шараға Кентау көпсалалы колледжінің студент-жастары қатысты. Өнегелі сағатта студент-жастардың назарына алтын жүректі азамат,бейкүнә сәбилерге пана болып, жүрек жылуын төккен қайырымды азамат, көп жылдар бойы денсаулық сақтау саласында еңбек еткен, бүкіл ғұмырын қайырымдылық пен ізгілікке , мейірім мен шаттыққа арнап, балаға деген жүрек жылуын айналасына шашып жүрген ерлі -зайыпты Ысқақ пен Гүлжаһан Жұмашевтардың соңғы 20 жыл бойғы тыныс-тіршілігін сөз еткен «Бақыт ұялаған шаңырақ» атты жинағы насихатталды.
Отбасы адамға бақыт, толық мәнді тыныс – тіршілік әкеледі. Отбасының басты қазығы, алтын діңгегі – бала. Баланың тәрбиелі жан — жақты болып өсуіне берекелі, өнегелі, ынтымақты отбасының ықпалы мол. Отбасы ата мен баланың, келін мен ененің және басқа да отбасы мүшелерінің жылы қарым — қатынасынан құрылады. Отбасы берекелі, тату болу үшін сыйластық, мейірімділік, жанашырлық, бауырмалдық, адамгершілік қасиеттер әр адамның жүрегінен орын алуы керек.
Отбасын құрғанда Адам өмірге ұрпақ әкеліп қана қоймай, сонымен бірге оған жалпы адамзаттық және ұлттық құндылықтарды, ата — бабасының салт — дәстүрін, жас ұрпақтың бойына сіңіртеді. Балаларын өздерін қоршаған ортаға және қоғамға пайдалы азамат етіп өсіру – ата — ананың ең маңызды міндеті.
«Отан оттан басталады» дейді халқымыз. Елдің, ұлттың, жалпы адамзаттың болашағы, даму деңгейі осы отбасынан басталады. Толық отбасында толыққанды тәрбие алған баланың келешегі кемел, болашағы жарқын болары айдан анық.
