Ордабасыда қыш зауыты іске қосылды. Ордабасы ауданында жаңа қыш зауыты іске қосылды. Халқы еңбекқор аудан тағы бір кәсіпорынмен толықты. Нысанның лентасын қиюға Түркістан облысы әкімінің бірінші орынбасары Арман Жетпісбаев арнайы келді. Арман Жетпісбаев ауданға жасаған сапарында әуелі Бадам ауыл округінде орналасқан «Karlskrona LC AB» жауапкершілігі шектеулі серіктестігінің жұмысымен танысты. Аталған зауыт құю өнімдерін, стандартты емес және электр жабдықтарын өндіреді. Өндіріс орны 2016 жылы «Үдемелі индустриялды-инноваутялық даму» мемлекеттік бағдарламасы аясында іске қосылған. Жобаның құны – 868,2 млн.теңге. 64 адам жұмыспен қамтылған. Жылына 3 мың тонна өнім өндіруге қауқарлы. Өнімнің қазіргі таңда елімізде теңдесі жоқ. Зауыт қара металдардың көптеген түрінен құймалар шығарады. Құйма материалдар мен бөлшектердің сапасы экспресс-зертханаларда тексеруден өткізіледі.
Сапар аясында бірінші орынбасар Бадам ауылындағы «Қазақ-Түрік индустриялды аймағында» орналасқан «Green Technology industries» ЖШС-ның өндіріс орнымен де танысты. Зауыт полиэтилен бұйымдарын қайта өңдеумен, синтепон талшығын өндірумен айналысады. Жылына 15 000 тонна өнім өндіруге қауқарлы. Құрылтайшылар- қытайлық инветорлар (49%). Инвестициялық құны – 6 млрд.800 млн.теңге. Зауытта бірінші кезеңде 100 адам, екінші кезеңде 150 адам жұмыспен қамтылған. Өндіріс орнында шығарылып жатқан өнімдер ішкі нарықтан бөлек Ресей Федерациясына жөнелтілуде. Бұл аймақта электр тапшылығы сезіледі –дейді зауыт басшылығы. Облыс әкімі бұл мәселені назарға алатынын жеткізді.
Аудандағы айтулы жаңалық Бадам ауылдық округіндегі «Bokei» автоматтандырылған заманауи қыш зауытының іске қосылуы. Индустрияландыру картасы аясында іске қосылған зауыттың құрылысы 2020 жылы басталып, 2022 жылдың шілде айында аяқталған. Тәулігіне 100 мың дана қыш шығаруға қауқарлы зауытта 60 адам жұмыспен қамтылып отыр. Олардың орташа айлық жалақысы 200-250 мың теңгені құрайды. Жоба «Бизнестің жол картасы» мемлекеттік бағдарламасымен жеңілдетілген 6% қаржыландырылған. Жобаның жалпы сомасы – 3 млрд.200 млн.теңгені құраса, жеке қаражаты есебінен 1 млрд.220 млн.теңге жұмсалған.Зауыт толығымен заманауи жабдықтармен жабдықталған. Қондырғылар Италия, Жапония, Франция, Ресей сияқты мемлекеттерде жасалынған. Арман Жетпісбаев аталған өндіріс орнының әлеуетінің зор екенін, зауыт өнімін Түркістан облысынан бөлек еліміздің барлық аймақтарына жөнелтуге қауқарлы екенін айтып, инновациялық жобаларға мемлекет тарапынан қашанда қолдау көрсетілетінін жеткізді.
Ордабасы ауданында бүгінгі таңда 40 кәсіпорын жұмыс істеп тұр. Оның ішінде 30 кәсіпорын өңдеу өнеркәсібі, 5 кәсіпорын тау-кен өндіру, 2 кәсіпорын электр энергиясымен жабдықтау, 2 кәсіпорын сумен жабдықтау салалары. Олардың өндірген өнімінің көлемі 2022 жылдың 9 айында 21 млрд. 189 млн. теңгені құрап отыр. Яғни, өткен жылдың тиісті кезеңімен салыстырғанда нақты көлем индексі 100,3 % құрап, 2 млрд.905,5 млн. теңгеге артты.
Үдемелі индустриялды-инновациялық даму мемлекеттік бағдарламасы аясында инвестициялық құны 105,1 млрд.теңге болатын 6 жоба іске асырылуда және 1 070 жаңа жұмыс орны құрылатын болады.Одан бөлек, ауданда ағымдағы жылы инвестициялық құны 3,3 млрд.теңге болатын, 152 жаңа жұмыс орнын ашатын 5 жоба іске асырылуда. жылдың 1-тоқсанында 13,5 млрд.теңгенің өнімі өндірілген. Жылдың жоспар – 105,0 млрд.теңгенің өнімін өндірілген.
