Еңбек адамдарына құрмет күшейеді. «Халық бірлігі және жүйелі реформалар – ел өркендеуінің берік негізі». Президент Қасым Жомарт Тоқаевтың биылғы Жолдауында осыған дейін жүзеге асқан жұмыстар қорытындыланып, алдағы жаңа мақсат-міндеттер нақтыланды. Маңызды құжатты жүзеге асыру мақсатында қалалық қоғамдық кеңес мүшелері ПетроҚазақстан мұнай өңдеу зауытының жұмысшыларымен кездесті.
Пандемия салған сергелдең ел экономикасы мен халық тұрмысына да едәуір кері әсерін тигізгені анық. Осы ретте, Президент бұл мәселеге де назар қойып, нақты тапсырмалар беріп өтті. Кәсіп ашамын деген жандарға жеңілдетілген несие беріледі. Одан бөлек, өндіріс орындарын салу үшін жер тегін телімі беріледі. Өндірістегі бірқатар шығын мемлекет тарапынан субсидияланады. Жиында сөз алған спикерлер жұмысшы қауымға осы жағын көбірек айтты.
Президент өз жолдауында қарапайым еңбек адамдарын құрметтеуді қадап айтқан болатын. Елдегі мұнай өнімдерін өндіру жағынан көш бастайтын «Петро Қазақстан» зауытында қазір екі мыңнан астам жұмысшы еңбек етуде. Оларды ынталандыру үшін түрлі әлеуметтік пакеттер қарастырылған.
Жолдауда еңбек нарығы, кәсіпкерлікті қолдау сынды негізгі 7 басымдық пен 5 бастамаға ерекше маңыз берілді. Президент Жолдауында елдің әлеуметтік-экономикалық даму бағыты айқын көрініс тапты. Мемлекетіміздің әрбір тұрғыны осындай қиын сәтте жасалған Президент Жолдауының маңызын ұғына отырып, ондағы тапсырмалардың реттілікпен іске асуына жұмыла еңбек етуі тиіс.
