Келес ауданындағы №10 «Игілік» жалпы білім беретін мектебінің 8-сынып оқушысы Қалдар Мейрамбек тұрмыстық қалдықтардан макет құрастырып, түрлі архитектуралық нысандар жасауды әдетке айналдырған екен. Ол бала күнінен бастап желімдеу, жапсыру, құрастыру өнеріне қызығушылық танытқан. Бүгінде ол түрлі дизайндағы қала сәулетін, тарихи кесенелер мен ауыл макеттерін өз қолымен құрастыра алады.
– Макет құрастыру, жапсыру, желімдеу техникасымен 6-сыныптан бастап айналысып келемін. Макеттің әрбір бөлшегін шын көңілмен жапсырып, қиялымдағы ғимараттарды жасап шығу мен үшін қиынға соқпады. Әр ісіме қатты мән беріп әзірлеймін және жасаған дүниемнің сапалы шығуын қадағалаймын. Бұл сүйікті ісіммен айналысқан маған қатты ұнайды. Жұмыс барысында маған ерекше шабыт пен жаңа идеялардың ойыма келуі де осы сүйікті ісіммен айналысқандықтан, – дейді жас сәулетші.
Оқушысының осындай ерекше қабілетін жетекшісі Нұрлыбек Лесбаев 6-сыныпта байқаған. Сол кезден бастап қабілетін арттыру мақсатында әртүрлі тапсырмалар беріп, макет құрастыру жағынан бағыт-бағдар беріп келеді.
– Дарынды оқушының болашақта білікті маман болатындығына нық сенімдімін. Осындай экологиялық жобалар бала бойында табиғатқа деген жанашырлықты қалыптастырып қана қоймай, қоршаған ортаны қорғауға үлкен үлес қосуда, – дейді жетекшісі.
Жер бетін жайлаған миллиардтаған адамдар күн сайын, сәт сайын миллиондаған тонна қоқыс тастайды. Осы тұрмыстық қалдықтардан қашып құтыла алмасақ та, оны азайтудың жолдарын қарастырып жүрген оқушының бұл әрекеті қуантады.
