8 наурыз – Халықаралық әйелдер мерекесі қарсаңында аудан әкімі Арман Айдарұлы ғасыр жасаған аналардың шаңырақтарына арнайы барып, мерекемен құттықтады.
Батыр аналарды ардақтау шарасы барысында аудан басшысы әр анамен жеке сұхбат құрып, мерекеге орай сый-сияпаттар табыстады.
Алдымен Нұрлы жол ауылының тұрғыны 103 жастағы Кескенбаева Жадыра әжейдің үйіне барған аудан басшысы алтын құрсақты әжейді арнайы мерекемен құттықтап, сый-сияпат табыстап, қарт әжеймен сұхбаттасты. Кескенбаева Жадыра Төлегенқызы 7 ұл-қызды дүниеге әкеліп, қазіргі таңда 35 немере, 82 шөбере, 4 шөпшек сүйіп отыр.
Одан кейін, аудан басшысы Сарыағаш қаласының тұрғыны, үлкен әулеттің ұйытқысы болып отырған 99 жастағы ақ жаулықты Сұлтанова Ұлбалаш әжейдің шаңырағына табан тіреп, аналар мерекесімен құттықтап, ақ орамал жауып, арнайы сыйлықтар табыстады. Батыр ана Ұлбалаш әжейдің 9 ұл-қызынан 50 немере, 20 шөбере, 4 шөпшек тараған.
«Баршамыз асыға күтетін ерекше мейрамда ең алдымен аналарымызды ардақтаймыз. Сіздер өмірді нұрландырып, шаңыраққа шаттық нұрын себесіздер. Сіздердің қолдауларыңыз әркімнің жүрегінде сенімділік ұялатып, шуақ сыйлайды. Осы айрықша қасиеттеріңіз мәңгілік салтанат құрып, елге ырыс-құт дарысын. Әрқашан, шаңырақтарыңыздың берекесі болып, үйлеріңізден жылулық кетпесін. Жанұяларыңызға береке, бірлік тілеймін!»,- деді аудан басшысы.
Өз кезегінде батыр аналар шаңырағына арнайы құттықтай келген аудан әкіміне ризашылықтарын білдіріп, жастық шақтарынан сыр шертті. Сондай-ақ ауданды өркендету бағытындағы жаңа бастамаларына сәттілік тілеп, ақ баталарын берді.
Сарыағаш ауданы әкімдігінің баспасөз қызметі
