Заманына қарай — амалы демекші, бүгінгі таң әлеуметтік желінің дамып жатқан кезеңі. Бұл бір жағынан халықтың ынтымағының артуына да себеп болып жатыр. Өйткені желі арқылы дүйім халық бірлік танытып, мұқтаж жандарға баспана, қаражат, қажетін алып беруде. Жалпы айтқанда еріктілер қатары артуда. Бұл қуанарлық іс. Мәселен, блогерлердің өзі бас болып бір емес, бірнеше мұқтадж жанның баспаналы болуына сеп болып отыр. «Басқаға қуаныш сыйлай білген – ең бақытты жан» деген екен Дени Дидро. Ерікті волонтер болу дегеніміз риясыз мейірімділік көрсету, жаңа дағдыларға үйреніп, адамдарға жақсылық жасау, төрт қабырға ішіне қамалып, тағдырына налып отыратын мүмкіндігі шектеулі жандардың қызықты да əсерлі істер мен оқиғалардың ортасында болуы үшін көмектесу, тағдырдың тезімен қиын жағдайға тап болған адамның жанынан табылу, қолынан келгенше сүйеу бола білу деген сөз. Ол екінің бірінің қолынан келмейтін іс. Ерікті волонтерлер болу үшін адамдарға ниет білдіру, жаны ашып, есіркей білу, ашуды ақылға жеңдіре білу, командада жұмыс жасай білу ғана емес, адалдық, парасаттылық сияқты адамгершілік қасиеттер керек. Мұқтаж адамдарға көмек қолын соза алатын кез келген адам волонтер бола алады. Волонтерлі қызметтің мақсатты бағытталған тобы түрлі көмекке мұқтаж жандар болуы мүмкін: ауру жəне ауру балалар, нашақор немесе маскүнем ата-ана балалары, жастар, мүгедектер, зейнеткерлер жəне кедей адамдар, сонымен қатар ҮЕҰ, жануарлар, табиғат жəне т.б. Бұрындары ата-бабамыз асар жасайтын болған. Бұл – ынтымақшыл халықтың жұмыла көтерген көмегі. «Асар» – бұл ерте уақыттағы «көмек сұраған» адамдарға ерікті көмек көрсету түрі. Бұл шақыруға келушілер, қыстақ салуда, той жəне жерлеу рəсімдерін ұйымдастыруға көмек берген. Асар түрлі жастағы жəне əр түрлі əлеуметтік статусқа ие адамдарды бір істе біріктіргенмұқтаж жанға көмек беру. Бұл ерікті көмек беру идеясының таралуындағы алғашқы қадамдар. Ол жеке бір индивидуалдық емес, қоғамдық игілік үшін қажет. Уақыттар өтті, асар əлі де бар, алайда оған паралельді көмектің түрі пайда болды ол волонтер. Ерікті болу игі іс. Қиын-қыстау кезеңде еріктілер тек аз қамтылған және көп балалы отбасылар ғана емес, сонымен қатар жалғыз басты қарт адамдар, тыл еңбеккерлері, мүмкіндігі шектеулі жандарға көбірек қол ұшін созды. Себебі, дәл осы санатқа жататын жандар карантиндік шектеулерге байланысты азық-түлік пен дәрі-дәрмек сатып алу үшін үйден шыға алмай қалды. Қиындықты жеңілдетіп, алысты жақындату мақсатында еріктілер көмегін аяған жоқ. Қоғам белсендісі Дәулет Төлеутайұлының бастамасымен құрылған «Dauletten қайырымдылық қоры», Ырысбала Икрамбай сынды блогерлер көпке өнеге болып, халықтың алғысына бөленуде. Жұмыла көтерген жүк жеңіл демекші, ел болып бірлігіміз нығая түссе біз алмайтын қамал жоқ!
