Бүгінде ауданымыздағы 60 мектепте 23 577 бала білім алуда. Соның ішінде 1356 бала биыл мектепті аяқтайды. Аталған оқушылардың ішінен 58-бала алтын белгіге, 106-бала үздік атестатқа үміткер.
Бұл жайында бүгін аудан әкімі Нұржан Ізтілеуовтың төрағалығымен өткен жиында аудандық адами әлеуетті дамыту бөлімінің басшысы Ержан Қадірбек баяндады.
Сонымен қатар, лездемелік жиында балалардың жазғы демалыс кезіндегі қауіпсіздігі егжей-текжейлі талқыланып, аудан әкімі бала өмірі ен басты құндылығымыз екенің айтып аталған мәселені қатаң бақылауда ұстап, алдын-алу бойынша аудандық адами әлеуетті дамыту мен төтенше жағдайлар бөлімі, жергілікті полицияға және ауыл әкімдеріне шомылу орындары мен барлық қауіпті өзен, көлдердің бойына кезекшілік ұйымдастыруды тапсырды.
Бұдан бөлек, апталық мәжілісте ауданымыздағы аса қауіпті инфекциялар бойынша эпидемиологиялық жағдай және ветеринарлық қызмет бойынша жауапты мекеме басшыларының баяндамасы тыңдалды.
Баяндама барасында Нұржан Жақсылықұлы ауданымызда залалсыздандыру жұмыстары өте баяу жүргізіліп жатқанын айтып, бұл бағыттағы жұмыстарды қарқындатуды тапсырды.
Қосымша баяндамашы Ж.Ақылбаева “Аса қауіпті жұқпалы аурулар” және Конго-Қырым қанды қызбасының өршуі мен оның алдын-алу, емдеу шараларын күшейту бойынша жауапты мамандармен арнайы семинар сабақтары өткізіліп, “сібір жарасы”, “құтыру” cынды ауруларға қарсы профилактикалық шаралардың жүйелі түрде өтіп жатқанын мәлімдеді.
Басқосуды түйіндеген аудан басшысы ауыл әкімдірі мен жауапты мекеме басшыларына жұқпалы аурулардың алдын алу бойынша халық арасында түсіндіру жұмыстарын күшейтуді ескертіп, аталған бағыттағы жұмыстардың төмен деңгейде ұйымдастырылуы тұрғындар арасында кене шағу фактілерінің көбеюіне әкеліп соғуы мүмкін деді.
Түлкібас ауданы әкімдігінің баспасөз қызметі
