«Волонтерлік» ұғымы латын тілінен аударылғанда – voluntarius «ерікті» мағынасын білдіреді. Волонтерлер (еріктілер) алуан түрлі қызмет үлгісін көмек ретінде көрсетеді. Қызмет тегін жүзеге асады. Кез келген адам еркіне қарай волонтер бола алады. Егер өзіңіз не серігіңізбен айналадағы қоқысты жинасаңыздар, экологиялық волонтерлік деп атауға болады. Демек волонтерлық қызмет – елдің әлеуметтік, мәдени, экономикалық және экологиялық дамуына әсер ететін күш. Түркістан облысы Сайрам ауданында волонтерлік ұйымның көмегімен қоршаған ортаны тазалау жұмыстары жүргізілді. Саидмуратов Эльер бастаған бір топ еріктілер Ақсу саябағының маңын, Құрманбек Жандарбек атындағы Мәдениет үйінің айналасын, темір жол вокзалы айналасына өз еріктерімен тазалық жұмыстарын жүргізді. Жалынды жастар бұл игі шараны әркез өткізіп тұруды үрдіске айналдырған. Волонтерлік қызметтің сан алуан түрлері бар. Ерікті болу – өз қолыңызда, бастысы өзгеге пайдаңыз тисе болғаны. Елімізде кеңінен таралған волонтерлік қызметтер бар: Олар:
Қоршаған ортаны сақтау: қорықтарды, өзен-суларды, жан-жануарларды аңшы-балықшы-броконьерлерден қорғау қызметі. Табиғи және әскери апат кезінде жапа шеккендерге көмек көрсету: психологиялық жәрдем, сауда-саттықпен көмектесу, тамақ дайындау, бұзылған объектілерді қайта қалыпқа келтіру, жоғалғандарды іздестіру, медициналық қолдау. Табиғи және техногенді апат алдын алу: адамдарды қауіпсіз аймаққа көшіру.
Білім беру саласын, инновацияны және ғылымды дамыту: мектепте, балабақшада, колледж, университет және түрлі кәсіби клубтарда қызмет ету. Тарихи және мәдени ескерткіштерді сақтау: нысанды қалпына келтіру жұмыстарына ат салысу.
Маңызды іс-шаралар ұйымдастыру: спорттық, мәдени, білім беру саласындағы шараларға қатысу.
Мүмкіндігі шектеулі жандардың ішкі потенциалын ашу: көрме ұйымдастыру, шеберлік сыныптарын өткізу. Волонтер болу – алдымен қоғамды сәл де болсын өзгертуге қадам. Әр адам өмірден негатив көре бергенше, “менің қолымнан не келеді?” деп сұрақ қойғаны жөн. Күніне бір сағат қоғамға тегін жұмыс істеу — әр адамның азаматтық борышы болуы керек деп ойлаймын. Иә, тегін жұмыс істесеңіз де, кейін жинаған тәжірибеңіз сізге екі еселеніп көмектеседі. Әлемге жақсылық нұрын шашу – өз қолымызда.
