Сауран ауданы түрлі тағдырмен киелі қазақ жеріне еріксіз жер аударылған және бұрыннан осында мекен еткен этнос өкілдерінің құтты қонысына айналған.️ Ауданда 10-нан астам этнос өкілі тұрады. Олар ауданында өз кәсіптерін дөңгелетіп отыр. Солардың бірі татар қызы Дариха Қасымова. Арғы ата-бабасы қиын- қыстау кезінде Шорнақ елді мекеніне келіп қоныстанған. Осында туылып, өсті. Қазақ азаматына тұрмысқа шықты. Қазақ отбасының салт-дәстүрін, әдеп-ғұрпын үйренді.
-Шорнақ менің туған жерім. Ұлтым татар болғанымен жүрегім қазақ. Қазақ халқына алғысым шексіз. Екі қыз, бір ұлды өмірге әкелдім. Олардан немере сүйіп отырмын. Қолымда сексеннен асқан енем бар. Жолдасыммен тату-тәтті өмір сүрдік. Өкінішке орай ол өмірден өтті. Тіршілік легін ұл-қыздарыммен жалғап келемін,-дейді Дариха апай.
Дариха саусағынан өнер тамған ісмер. Қазақтың түрлі оюларын ойып, кимешек пен ұлттық нақыштағы балалар киімін тігеді. Сәнін келтіріп құрақ құрайды. Бұған дейін ол Түркістанның базарында қазақы нақыштағы шапандар сатқан. Тігіс тігуге ойламаған сәтте келдім дейді.
-Түсімде аппақ киім киген қарияны көрдім. Ол маған таңертең тұрып қолыңа ине-жіп алып тігіс тігесің деп аян берді. Сол түстен кейін мен қолыма ине алдым. Осы кәсіппен айналысып жатқаныма он жылдан астам уақыт болды. Қазақтың ұлттық оюларының әрқайсысының сыры көп. Шаршағанда, көңіл күйім болмағанда ою оямын. Дем береді. Ұлттық киімдерге, кимешекке тапсырыс қабылдаймын,-деді ісмер.
Біз сұқбаттасу үшін Дариха апайдың үйіне барғанымызда ол кезекті тапсырысын орындап отыр екен. Қызылорда облысының бір топ әжелері кимешек тапсырыс беріпті. -Кимешектің өлшемін қалай аласыз?- деген сұрағымызға Дариха апай: -Өлшем алмаймын. Құдайдың құдіреті тіккен бас киімдер тура келіп, бастарында тұра қалады. Жұмысыма сын айтылып, кері қайтарылған емес,- деді. Расында қолынан шыққан дүние көздің жауын алады. Әсіресе бүлдіршіндерге арнап тігілген ұлттық киімдердің әдемілігі бірінен бірі өтеді. Құралған құрақтың да артық, кемі жоқ. Дариха апайдың ұлы да темірден түйін түйген шебер. Дәнекерлеуші. Күйеу балалары мен қыздары да ісмерліктен алыс емес. Қасымбековтер отбасын ауыл, аймақ «алтын қолды, шебер отбасы» деп атайды. Татар қызының ісмерлігі бізді тәнті етті. Қазақтың оюын ойып, құрағын құрап, салт санамыздың дамуына өзіндік үлесін қосқан Дариха апайға тілеулес болып қайттық.
Бірлігі жарасқан елдің, тірлігі өнімді. Қариясының бергені бата, ақ жаулықты анасының тілеуі ел тыныштығы. Жастары иіліп елге еңбек етіп, ауданның дамуына өзіндік үлестерін қосып жатыр. Мұның барлығы «Достық мекеніндегі» «Бірлік» дейтін елде болып жатыр.
Сауран ауданы әкімдігінің баспасөз қызметі
