ТҮРКІСТАН — ЖАҢА ҚАЗАҚСТАН ТҰҒЫРЫНДА
Түркі әлемінің рухани астанасына айналған Түркістан қаласының халқы шаһардың мерекесін кеңінен тойлады. Мерекелік іс шараны қалалық мәдениет үйінің өнерпаздары ұйымдастырып, қала қонақтары мен тұрғындарына ерекше көңіл күй сыйлады. Түркістан қаласы облыс орталығы болғалы адам танымастай өзгерді. Ертедегі Яссы, ежелгі Түркістан бүгінгі жаңа қалаға айналды. Түркістандағы Фараб кітапханасында қала күніне арналған мерекелік жиында ақ жаулықты әжелер ауылдың алты ауызынан ән айтып, келген қонақтарға ұлттық тағамдарды ұсынды.
Мерекелік шарада «Қол өнерім – мол өнерім» атты көрме ұйымдастырылды. Мұнда шеберлер мен ұсталар өздерінің қолдарынан шыққан бұйымдарын әкелген. Гаухарбек Баянбайұлы көрмеге өзінің «Жер ана — ел ана» туындысын әкеліпті. «Төл өнеріміз арқылы туристер мен қала қонақтарына қазақтың мәдениетінің бір көрінісін көрсету парызымыз — дейді шебер.
Мерекелік кеш халық театры сахналаған «Иассы шаһары» қойылымымен басталды. Түркістанның тарихы мен жаңарған Түркістаннның келбетіне арналған бейне фильм көрсетілді. Сонымен қатар, қаланың дамуына белсенді үлес қосқан бірқатар азаматтар қала әкімінің «Құрмет грамотасы» және Алғыс хаттармен марапатталды.
Қала күні мерекесінде облысымыздың тумасы, әнші Жұбаныш Жексенұлы әнімен шашу шашып, көпшіліктің қошеметіне бөленді.
Мерекелік жиында Түркістандық өнерпаздар әннен шашу шашып, мың бұралған бишілер сахнаны сәнге бөледі.
