Түркістанға АҚШ-тың бас консулы келді. Америка Құрама Штаттарының Алматыдағы Бас консулы Кэролайн Сэвидж Түркістанға кезекті рет жұмыс сапарымен келді. Мәртебелі мейманды Түркістан облысы әкімінің орынбасары Сәкен Қалқаманов қабылдап, келіссөздер жүргізді. АҚШ консулы оңтүстік өңірге адам құқығының сақталуы қаншалықты деңгейде екенін білуге келген. Кездесуде АҚШ консулы Түркістан өңірін дамыту бағытындағы жобаларды талқылауға дайын екенін жеткізді. Адам құқығы, адам саудасы, су мәселесі, жаңа қуат көздерін пайдалану, үкіметтік емес ұйымдармен жұмыс жүргізу бойынша сұрақтарын қойып, тиісті мағлұмат алды.
Әкім орынбасары Сәкен Қалқаманов Түркістан облысы құрылғаннан бастап өңірдің экономикалық-әлеуметтік дамуы жақсарғанына тоқталды. Аймақта 2018 жылдан бері инвестиция көлемі артып, шет ел инвесторларымен әріптестік орнату бағытындағы жұмыс күшейгенін айтты. АҚШ мемлекеті тарапынан келетін инвесторларға қолайлы жағдай жасауға, әріптестік орнатуға әрдайым дайынбыз деді. Сонымен бірге кездесуде Түркістанның дамуына Орта Азия мемлекеттерінің әсері, жаңа қуат көздерін табу, су ресурсын үнемдеу, ауыл шаруашылығы саласында жаңа жобаларды қарастыру мәселелері сөз болды.
