Таяуда Түлкібас ауданында Мыңбай ауылының тұрғыны, абзал ана, еңбек ардагері Рабиға Дербісәлиеваның «Көрсетпедім, көзімнің тамшыларын…» атты естелік кітабының тұсаукесері өтті.
«Нұрдана-LTD» ЖШС баспасынан шыққан кітапта қарапайым қазақ әйелінің өнегелі өмір жолдарынан сыр шертеді. Жастық шағы соғыстан кейінгі ауыр жылдарда өткен Рабиға Серікбайқызының білім мен өнерге деген құштарлығы, отбасына, перзенттеріне деген сүйіспеншілігі, қоршаған ортаға деген жанашырлығы кітапта тартымды баяндалған. Бас кейіпкер ұжымшарда еңбек ете жүріп, тағдыр тауқыметімен мүгедек болып туылған балаларын ешкімнен кем қылмай жетілдіріп, Құдай қосқан қосағы Жайшыбекке сүйеу болып, осы әулеттің бар ауыртпашылығын көтере білген. Түрлі ән байқаулары мен айтыстарда топ жарған Рабиға апаның қайсарлығы кейінгі буынға сабақ боларлық өнеге. Бүгінде сексен жасқа қадам басып, немере-шөбере сүйіп отырған абзал ананың алғашқы кітабы жатық тілімен, ұшқыр ойымен, түрлі естелік оқиғаларымен оқырмандарын тарта түседі.
Салтанатты іс-шараның соңы Машат ауылдық Мәдениет үйінің меңгерушісі Бақытжан Байжұма ұйымдастырған әдеби-сазды концерттік бағдарламаға ұласып, жиналған қауымға ерекше көтеріңкі көңіл-күй сыйлады. Естелік кітабын өз қаражатына шығарған әжейдің тырнақалды еңбегіне ауыл тұрғындары айрықша құрмет көрсетті.
Орынтай КӨМЕКОВ.
Түлкібас ауданы.
