Қазығұрт ауданы орталығында орналасқан Мәдениет сарайында аудандық адами әлеуетті дамыту бөлімінің ұйымдастыруымен «Үміт» форумының ХІІ-ші жиыны өтті. Аталған жиынға аудан әкімі Азизхан Исмаилов, аудандық мәслихаттың төрағасы Тайбек Қалымбетов, білім саласы қызметкерлері, белсенді оқушылар мен ата-аналар қатысты. Аудан әкімі Азизхан Әзімханұлы форумда алғы сөз сөйлеп, барша оқушылар мен мұғалімдерді жеткен жетістіктерімен құттықтап, бірқатарын арнайы Алғыс хаттармен марапаттады.
Айта кетейік, жастардың білімге барынша ден қоюы — Жаңа Қазақстанды құрудағы маңызды фактор болып табылады. Өйткені, бүгінгі заман білімділер мен біліктілердің заманы. Жыл сайынғы дәстүрге сәйкес, өткізіліп отырған «Үміт» форумының басты мақсаты — аудандық, облыстық, республикалық дәрежеде ұйымдастырылып жатқан түрлі білім сайыстарында топ жарып, үнемі үздіктер қатарында көрініп жүрген білімді оқушылардың еңбегін бағалау және оқуға құштарлығын арттыру. Осы орайда, 2022-2023 оқу жылында ауданда түрлі бағыттарда сайыстар, байқаулар және пәндер бойынша олимпиадалар ұйымдастырылып, оған 4525-ке жуық оқушы қатысты. Оның 600-ге жуығы аудандық байқау жеңімпаздары, ал 280-ге жуығы республикалық және облыстық байқаулар жеңімпаздары атанды.
Қазығұрт ауданы әкімдігінің баспасөз қызметі
