Жас ұрпақты имандылық пен парасаттылыққа тәрбиелеу, ұлттық құндылықтарымызды дәріптеу, салт-дәстүр, әдеп-ғұрпымызды насихаттау және отбасыдағы әжелер тәрбиесінің ерекшеліктерін түсіндіру мақсатында Жамбыл ауылдық округі, Кеңесшіл ауылындағы Мәдениет үйінде «Мәдени мұра» бағдарламасы аясында «Аналар сөзі – тәрбие көзі» атты аудандық әжелер байқауы өтті.
Бес кезеңнен тұратын байқауға сегіз ауылдық округ пен екі кенттен алпыс жастан асқан әжелер қатысты. Алғашқы «Сәлемдесу кезеңінде әжелер өзін-өзі таныстырып өтті. Екінші кезеңінде өз өнерлерін көрсетті. Ән шырқап, би билеген әжелер көркемсөз оқыды. Сайыстың төртінші кезеңінде мақал-мәтел айтудан жарысып, салт-дәстүр бойынша сұрақтарға жауап берді. Байқаудың соңғы кезеңінде казақтың салт-дәстүрінен көрініс қойды.
Айта кетейік, сахнада салт-дәстүр бойынша көрініс қойған әжелер бір-бірін қайталамай, әрқайсысы әртүрлі дәстүрдің терең мәнін ашып берді.
Байқауға қатысқан барлық әжелер ұлттық киімдермен шығып, сахнаға сән берді. Әжелердің дайындығын ерекше атап өткен жөн. Әсіресе, Өктем Батырханова әжейдің кітапты көп оқығандығы, жастарға өнеге болатын терең ойлы сөздері, Гүлжар Жанысованың салт-дәстүр көрінісіндегі «көген түп, жиен құрық» дәстүрі, Қыздаркүл Саржанованың суырып салма ақындығы, Ұлзада Қалымбетованың он саусағынан өнері тамған шеберлігі көрермендерді тәнті етті.
Әділқазылар алқасының шешімімен І орынды мырзакенттік Гүлжар Жанысова жеңіп алса, ІІ орынды атакенттік Өктем Батырханова әжеміз еншіледі. Ал, ІІІ орын Мақтаарал ауылдық округінің тұрғыны Қыздаркүл Саржанова мен Жамбыл ауылдық округінен келген Майсагүл Пашаеваға бұйырды. Сонымен қатар, үш әжеге «Шебер әже», «Өнегелі әже», «Сымбатты әже» номинациялары бойынша сыйлықтар берілді. Барлық әжелер бағалы сыйлықтармен және грамоталармен марапатталды.
Сәбит ҚАЛДЫБАЕВ. Мақтаарал ауданы.
